Ubuhinde bwatanze inkingo za Covid-19 zibarirwa muri za miliyoni mu bihugu bituranye byo muri Aziya y’Epfo

Mu gikorwa kidasanzwe kigamije gutsura umubano mwiza n’ibihugu by’amahanga, Ubuhinde bwatanze inkingo za Covid-19 zibarirwa muri za miliyoni mu bihugu bituranye byo muri Aziya y’Epfo. Izo ngingo zikorerwa mu Buhinde, zavumbuwe n’ikigo AstraZeneca cyo mu Bwongereza.

Abasesengura ibya politike baravuga ko mu gutanga izi nkingo, Ubuhinde bugamije kugaragaza ingufu zabwo, no gutsura umubano mwiza n’ibihugu byo muri Aziya y’Epfo. Bemeza kandi ko ibyo bigamije no gukoma imbere ubukaka bw’Ubushinwa bwari butangiye kwigaragaza muri ibyo bihugu.

Nk’igihugu kiri ku isonga mu gukora inkingo ku isi, Ubuhinde burashaka gufata umwanya wa mbere mu gukwirakwiza inkingo zihendutse z’icyorezo cya Covid -19 mu bihugu bikennye n’ibikiri mu nzira y’amajyambere.

Ikigo cy’Ubuhinde cyitwa Serum Institute cyafatanije n’icyo mu Bwongereza AstraZeneca mu gukora urwo rukingo. Mu minsi mike ishize urwo rukingo rwagejejwe mu bihugu birimo Bhutan, Nepal, Bangladesh, Maldives, Myanmar, Ibirwa bya Maurice, na Seychelles.

Nyuma y’iminsi mike ubuhinde butangiye gahunda yo gukorera urwo rukingo imbere mu gihugu, bugiye kohereza inkingo za Covid -19 muri Sri Lanca na Pakistani, ibyo bihugu ni bimara gutanga uburenganzira.

Gusa, Pakistani, igihugu gifatwa nka mukeba w’Ubuhinde nubwo cyemeje ikoreshwa ry’inkingo zikorwa na AstraZeneca, ntikigaragara ku rutonde rw’ibihugu Ubuhinde buzatangamo izo nkingo.