Mu Burundi Abarimo General Godefroid Niyombare Bakatiwe Burundu
Abantu barenga 30 barimo abasirikare, abanyapolitike, abanyamakuru, aba sosiyete sivile n’uwari umuvugizi wa Perezida Pierre Nkurunziza, bakatiwe gufungwa burundu n’urukiko rw’ikirenga mu Burundi.
Aba, bose baba hanze y’u Burundi, barezwe kugerageza guhirika ubutegetsi mu 2015 no kwangiza ibya rubanda.
Umwe mu bakatiwe yavuze ko uru ari urubanza rw’urwango, kandi ari “ingingo ya politiki igamije kubanyaga no gutera ubwoba abari mu gihugu ngo ntibavuge ikitagenda neza”.Inyandiko y’urukiko ibakatira yakwiriye ku mbuga nkoranyambaga, itegaka ko imitungo yabo izagurishwa kugira ngo hishyurwe agera kuri miliyari 1.5 y’amarundi (ni hafi $780,000) ku bangirijwe, barimo n’ishyaka CNDD-FDD riri ku butegetsi.
Inyandiko y’urukiko yerekana ko muri abo bakatiwe harimo abari abasirikare bakuru nka Jenerali Godefroid Niyombare uwari ukuriye umugambi waburijwemo wo guhirika uwari Perezida Pierre Nkurunziza mu kwa kane 2015.
Abandi barimo;
- Gaciyubwenge Potien wari minisitiri w’ingabo,
- Jenerali Guillaume Nabindika
- Jenerali Leonard Ngendakumana,
- Col Habarugira Philbert,
- Col Ntiranyibagira Jeremie n’abandi…
Mu banyapolitiki harimo;
- Leonidas Hatungimana wahoze ari umuvugizi wa Perezida Pierre Nkurunziza,
- Bernard Busokoza wigeze kuba visi prezida,
- Moise Bucumi uri mu bashinze CNDD-FDD wahoze ari minisitiri w’ingufu
- Minani Jean wabaye umukuru w’ishyaka Sahwanya Frodebu Nyakuri
- Onesime Nduwimana wigeze kuba muri CNNDD-FDD, ubu ni umunyamabanga w’ihuriro CNARED
- Alexis Sinduhije wari umunyamakuru ubu ukuriye ishyaka MSD
Mu banyamakuru cyangwa abari abanyamakuru, harimo;
- Muhozi Innocent
- Habyarimana Alcade
- Rugurika Bob
- Niyonkuru Gilbert
- Nduwimana Patrick
- Diedone Bashirahishize
- Mitabaro Patrick
- Niyuhire Anne
Harimo kandi abo muri sosiyete sivile nka Marguerite Barankitse washinze ishyirahamwe rifasha Maison Sharom na Pacifique Nininahazwe impirimbanyi y’uburenganzira bwa muntu, n’abandi.
Umwe mu bakatiwe, Onesime Nduwimana, yagize ati: “Imanza ntizicibwa kuriya. Urubanza umuntu ataburanye, urubanza rw’ikivunga, ruterekana uruhara rw’umwe umwe, si urubanza ni ugwango gusa.”
Nduwimana mu 2003 wabaye minisitiri w’itumanaho n’umuvugizi wa leta ari mu ishyaka CNDD-FDD, avuga ko uru rubanza “rwahishwe” ari “ingingo za politique zifatwa n’akarwi k’abantu bagahereza abacamanza ngo shyiraho umukono.”
Rugurika Bob nawe wakatiwe gufungwa burundu, yatangaje kuri Twitter ko “uru rubanza ruhishe rugaragaza kuburizamo kw’ikintu cyose gishaka gufungura urubuga mu Burundi”
Abajijwe niba bazajurira n’aho bazabikorera, Onesime Nduwimana yagize ati: “nubwo bigoye ntituzabireka kuriya.”