Paul Rusesabagina Ntabwo Yitabiriye Iburanisha
Paul Rusesabagina , ntabwo yagaragaye mu baburanyi bitabiriye iburanisha ryo kuri uyu wa Gatatu tariki 24 Werurwe mu Rugereko rwihariye ruburanisha Ibyaha Mpuzamahanga n’Ibyambukiranya Imipaka nkuko tubikesha igihe.com
Rusesabagina na bagenzi be 20 barimo Nsabimana Callixte ‘Sankara’ wari Umuvugizi wa FLN, bakurikiranyweho ibyaha bitandukanye bifite aho bihuriye n’iterabwoba.
Biteganyijwe ko kuri uyu wa Gatatu urubanza rukomeza humvwa umwunganizi wa Nsabimana Callixte ari we Moise Nkundabarashi kuko iburanisha riherutse tariki 12 Werurwe, Nsabimana ari we wireguraga yemera ibyaha 17 ashinjwa.
Mu iburanisha ry ubushize, Paul Rusesabagina yatangaje ko atiteguye kugaruka murukiko kuko nta butabera buhari.
Yagize ati “Ndagira ngo mbwire urukiko n’ubucamanza ko uburenganzira bwanjye bw’ibanze bwo kwiregura no kugira uburenganzira ku rubanza ruboneye, urukiko rwanze kubwubahiriza.”
Yakomeje agira ati “Kuba rero uburenganzira bwanjye bwanze kubahirizwa, ndagira ngo menyeshe urukiko ko nta butabera na bumwe ntegereje hano bityo nkaba mbamenyesha ko ntazongera kwitabira uru rubanza. Urubanza rwanjye ndaruhagaritse.”
Byaturutse ku mwanzuro urukiko rwari rumaze gufata wo gutesha agaciro ubusabe bwa Paul Rusesabagina wasabaga guhabwa igihe gikwiye cy’amezi atandatu yo gutegura neza dosiye ye ngo kuko atabonye uburyo bwo kubikora.
