Rayon Sport Yakoze Ibyo Abafana Bifuzaga

Ikipe ya Rayon Sports iheruka igikombe cya shampiyona mu mwaka w’imikino 2018-2019 yazanye izindi mbaraga ihita isinyisha Muhire Kevin umunyarwanda ukina hagati mu kibuga wakinaga mu ikipe ya Saham SC muri Oman kimwe na Hertier Luvumbu (DR Congo) wakinaga muri Youssoufia Berrechid muri Morocco.Muri gahunda yo kwiyubaka banitegura imikino ya shampiyona 2020-2021 izakinwa mu matsinda kuva tariki ya 1 Gicurasi 2021 kuzageza kuwa 29 Kamena 2021, Rayon Sports yagaruye Muhire Kevin wakinaga muri Saham mu cyiciro cya mbere muri Oman.Muhire Kevin wabaye muri Rayon Sports (2015-2019) mbere yo kujya muri Misr Lel Makasa mu cyiciro cya mbere mu Misiri. Nyuma Misr Lel Makasa yaje kumutiza muri El Gaish SC muri Mutarama 2020 aho yavuye nyuma y’umwaka w’imikino 2019-2020 agana muri Saham SC.
Héritier Luvumbu Nzinga ni umukinnyi ukomoka muri Repubulika Iharanira Demokarasi ya Congo (DR Congo) w’imyaka 26 ushobora gukina mu mpande z’ikibuga asatira ndetse akaba umukinnyi mwiza wo hagati mu kibuga haba mu makipe yakiniye n’ikipe y’igihugu ya DR Congo.Héritier Luvumbu w’imyaka 26 yakinaga mu ikipe ya Youssoufia Berrechid muri Morocco akaba aje gufatanya na Rayon Sports mu rugendo rwo gushaka igikombe cya shampiyona nk’uko ubuyobozi bw’iyi kipe bukomeje kubihamya mu mbwirwaruhame zitandukanye.Héritier Luvumbu yabaye mu makipe atandukanye nka AS Vita Club y’iwabo muri DR Congo (2014-2017) aho yanakiniye ikipe ya DR Congo muri TOTAL CHAN 2016 yabereye mu Rwanda bakanatwara igikombe.Nyuma ya TOTAL CHAN 2016, Héritier Luvumbu yagiye mu ikipe ya Union SG mu Bubiligi akinayo umwaka umwe (2017-2018) mbere yo gusinya muri AS FAR muri Morocco naho amarayo umwaka umwe (2018-2019) mbere yo kujya muri Youssoufia Berrechid.Rayon Sports iri mu itsinda rya kabiri (B) kumwe na SC Kiyovu, Gasogi United na Rutsiro, imikino nyirizina ikaba izatangira tariki ya 1 Gicurasi 2021.

Niyirema Kharufani