Kera Kabaye, Madagascar Yemeye Inkingo za COVID 19

Madagascar yahinduye ingendo ifata icyemezo cyo kujya muri gahunda y’ibihugu by’amahanga igamije gusaranganya inkingo za coronavirus n’ibihugu bicyennye izwi nka Covax.

Mu butumwa bwa videwo bwatangajwe ku rubuga rwa Facebook rwa minisiteri y’ubuzima, Minisitiri Jean Louis Rakotovao yagize ati:

“Haracyari ibyiciro byinshi byo kunyuramo mbere yo kugera ku nkingo, ariko no kuba twiyandikishije na byo ni intambwe ikomeye muri iyi gahunda”.

Mbere, Madagascar yari yamenyesheje ko itazajya muri gahunda ya Covax. Yari yavuze ko ahubwo izakoresha umuti gakondo wayo uzwi nka Covid-Organics.

Uwo muti uboneka mu buryo bw’ikinyobwa n’ikinini, ndetse Perezida wa Madagascar Andry Rajoelina yawamamaje nk’uvura Covid-19.

Kugeza ubu nta muti uriho wa coronavirus, nkuko bivugwa n’ishami ry’umuryango w’abibumbye ryita ku buzima (OMS/WHO).