Malawi: Inkingo za COVID 19 Zirangizwa Uyu Munsi!
Inzego z’Ubuzima muri Malawi zatangaje ko zigiye kujugunya inkingo za Covid-19 zisaga 19000 zo mu bwoko bwa AstraZeneca .
Izo nkingo zirangizwa kuri uyu wa Gatatu kubera ko zarangije igihe kandi ubuyobozi bukaba buvuga ko nta bushobozi buhari bwo kuzikoraho ubushakashatsi ngo bamenye niba bazihaye abantu nta ngaruka byagira.
Malawi iraba ibaye igihugu cya mbere muri Afurika cyangije inkingo za Covid-19 kubera iyo mpamvu, nk’uko BBC yabitangaje.
Leta ya Malawi yatangaje ko kwangiza izo nkingo bigamije guha icyizere abaturage ko bitaweho, ndetse ko inkingo zidafitiwe icyizere zidakoreshwa kugira ngo bakangukire kuzifata ku bwinshi.
Kugeza ubu Abanya-Malawi ntabwo barakangukira kwitabira guhabwa urukingo rwa Covid-19. Leta ifite impungenge ko inkingo zarangije igihe zitanzwe byarushaho kugabanya umubare w’abitabira kwikingiza.
Abaturage ba Malawi basaga 330000 nibo bamaze kwikingiza urukingo rwa Covid-19.
